O pisinisi poo faleoloa i luga o upega tafailagi e igoa o le Shein ma le Temu ua ta’ua i lipoti ua silia ma le tai 2 piliona tupe ua maua i faatauga mai Ausetalia lava ia i le tausaga nei ma ua faailoa e le ABC o le sologa lelei o pisinisi a nei kamupani e lē taumate ua aafia ai nisi o pisinisi i totonu lava o le atunuu.
O le suesuega na faia e le kamupani a le Roy Morgan ua iloa ai e silia ma le 2 miliona tagata Ausetalia ua faia faatau i masina taitasi i faleoloa ia e lua ma isi foi auaunaga i luga o upega tafailagi, online retailers, e taufogie foi tau o a latou oloa.
Fai mai le suesuega o le Temu e lei leva nei ona faalauiloaina ae o le app aupito taatele lea ona download e tagata i le taimi nei mo faatauga.
O le uiga o le igoa o lea auaunaga, TEMU – team up, price down ma sa faalauiloa muamua i le malo tele o Amerika ae o le Shein sa faavaeina i Saina.
