Ua iva nei tausaga o taulamua le Malo e ala mai i le Matagaluega o Tina ma Tamaitai, Atinae o Afioaga ma Aga Fesootai, e lagolago i le polokalame a Malo Aufaatasi o le 16 aso o faalauiloa e tafiesea ma tetee atu ai i le sauaina o tina ma tamaitai ma fanau teine laiti aemaise o sauaga i totonu o aiga.
O le tausaga nei ua faaautu le polokalame lenei a le matagaluega i le mau tauave, o le “Malu i Fale”. O faamaumauga i se suesuega na faia i le tausaga e 2000 na faamauina ai le maualuga o sauaga nei i lo tatou atunuu e tusa ma le 46 pasene, ae i le isi suesuega na faia i le 2017 e leai se alu i lalo o ia fuainumera ae na siitia i le 60 pasene sauaga, ma e lilifa lava i le sauaina o tina e o latou taitoalua.
O le saunoaga a le Minisita o Tina ma Tamaitai, Atiinae o Afioaga ma Aga Fesootai i le amatalia o polokalame o le 16 aso, na ia faailoa ai ni atugaluga i le tulai mai pea o ia sauaga, ma ua tatau ai ona faia se suiga i polokalame o loo tala’i atu ai i le atunuu le tetee atu i ia faiga.
O le saunoaga foi a le Minisita le afioga Leota Laki Sio Lamositele na ia faailoa ai ei le va o le 98 miliona ma le 132 miliona tala e faaalu i le tausaga i galuega ma auaunaga e fesootai ma sauaga i totonu o Samoa, e fua i le faavasegaina o le tulaga aoao tetele o le tamaoaiga o le atunuu le GDP poo le Gross Domestic Product.
O Samoa le isi atunuu ua maua le faailoga taualoa i le lelei faatino o ana taumafaiga e faaitiitia ai sauaga, ma o lea faailoga na faailoa lautele i se fono faavaomalo sa faia i Mexico talu ai nei.
O le amatalia o polokalame o le 16 aso o le tetee atu i sauaga na tauaao atu ai le faailoga taualoa i le tamaitai Palemia le afioga Fiame Naomi Mataafa. O le aufaipese lauiloa o le Punialavaa na latou tusia ma lagiina se pese ua autu i polokalame o lenei tausaga.
