Ua tau lalata nei i le amatalia ai o taaloga o le Pasefika i Solomona ma le faamoemoe ina ia galulue faatasi i le faalauiloaina lea o gaioiga ma faatinoga auā se siosiomaga mamā ma puipuia.
I pepa o faamatalaga mai le ofisa o polokalame tau i le siosiomaga a le Pasefika (S.P.R.E.P.) ua faalauiloa ai le lagolago ina ia maioio vaega uma o le a faatino ai nei faalauiloa i nofoaga o le a faatino ai taaloga.
O le ofisa a le S.P.R.E.P. o loo galulue faatasi ai ma le Malo o Solomona e tauala atu i le Matagaluega o le Siosiomaga ina ia faatino lenei faamoemoe ina ia faailoa ai le feau momoli mo le puipuia lelei o le siosiomaga e ala i faatinoga e faia.
Sa faatino le totoina o laau ma nisi o vaega e aofia ai le faaitiitia lea o lapisi uga ma le tumamā lautele.
O le faalauiloa lenei sa faatinoina i le tausaga 2019 a o talimalo ai Samoa i taaloga o le Pasefika ma o se faamoemoe sa tulaga maoae lona faatinoina aemaise o le lagolago a le atunuu.
