E iai videos ua alia’e i le asō i le taimi na maua ai e se tagata laveai, lifesaver se poloka o le fualaau faasāina o le cocaine mai le matafaga i Bondi.
O ia videos na muai lomia ata e le Sydney Morning Herald o loo maua atu ai le ata o le taimi na maua ai le afifi lea i totonu o le jetski sa ia faaaogāina ma o loo tusia ai i luma o le afifi le igoa “zoe”.
Na faamoemoe lea alii e logo leoleo i le mataupu lea ae o lona manatu masalo pe 100 afe i le 200 afe se vaegatupe e maua ai mai lea afifi.
A o lei faia le Kerisimasi o le tausaga na tea nei na vaaia ai nisi afifi faapea o le cocaine o tafea ane i gataifale o matafaga i le itu i Matu o Sini ma e foliiga mai o le uta lea e sau ai ma le poloka lea e maua mai totonu o le jetski.
I faamaumauga a leoleo NSW o loo ta’ua ai e 253 kilo o le cocaine na maua mai matafaga i le masina talu ai.
