Ua amata ona alia’e popolega o nisi i se isi foi ituaiga vairusi ua alia’e mai foi i Saina ma e lē o tele ni faamatalaga ua avanoa mai e tusa o lea vairusi peitai ua manino o loo faia iai su’esu’ega ina ua alia’e lipoti ua to’atele tagata ua aafia.
O le vairusi e faaigoaina o le Langya henipavirus e faapuupuu o le LayV e mafua ai le fiva, vaivai o le tino, tale, lē fia taumafa ma le tiga o maso o le tino ma ua lipotia na mua’i alia’e i le faaitu o Shandong ma Henan i Saina i le 2019 peitai o lea faato’ā aloa’ia ona iloa.
E oo mai i le taimi nei fai mai ua 35 tagata ua aafia ai e mātele lava i tagata e faigaluega i faato’aga ma fale gaosi oloa. E talitonu saienitisi e pei ona ta’ua i le One News e pepesi mai le vairusi lea mai meaola i tagata ae lē o mailoa i le taimi nei pe mafai ona pepesi i le va o tagata. O loo faatalia nisi o su’esu’ega o loo faia i le taimi nei e iloa ai nisi faamatalaga faaopoopo i lea ituaiga vairusi.
