O le masina o Iuni o le tausaga fou 2026 o le a amata ai se tautua fou a le kamupani vaalele o le Qantas a Ausetalia, o le a faia ai ni ana malaga mai Aukilani e aga’i sa’o mai i Samoa.
Ua faailoa e le Qantas lea suiga i ana malaga mai Ausetalia aga’i ane i Aukilani i Niu Sila ma le faamoemoe o le a tauva ai ma le kamupani vaalele o le Air New Zealand o loo malaga to’atasi ona vaalele i malaga tuusa’o mai Aukilani mo Samoa talu mai le tausaga e 2022 na lē toe faia ai ni malaga a le Samoa Airways.
E tolu malaga i le vaiaso a le Qantas mai Aukilani mo Apia lea ua faamoemoe e amata i le aso 16 o le masina o Iuni o le tausaga fou.
Ua faailoa ai foi e lea kamupani vaalele le pasese amata e $370 tālā Ausetalia mai Aukilani i Samoa ae lē o manino mai poo le pasese lea i le malaga mai ma toe foi pe o le malaga e tasi.
