Ua faamaonia mai e le Asosi o Tusitala ma Ofisa faasalalau a Samoa le Journalists Association of Western Samoa (J.A.W.S) ua solia e le itulau faasalalau a le Loabay Samoa nisi o tulafono taua o le galuega faatusitala ma o le a faia iai se fuafuaga a le Asosi.
Ua afua lea tulaga ona o se faaseā a lē sa avea ma Ofisa Sili o le Matagaluega o Faamasinoga susuga Papalii John Taimalelagi faasaga i le Loabay Samoa masalomia le faaleaga ai o lona tagata (defamed his character).
Na faamaonia lea tulaga e le Peresetene o le J.A.W.S Lagi Keresoma ina ua fesiligia e le Samoa Observer.
O le faaseā a Papalii na tuuina atu i leoleo ma le Asosi o Tusitala i Samoa e faasino tonu lava i le Faatonu o le Loabay Samoa Gagu Fau Gagu i lona faia o ni tusitusiga i luga o le itulau Facebook a le Loabay e tauleagaina ai o ia.
O se vaega o lea faaseā o se tusitusiga na faia e le Loabay Samoa i le Aso 31 o Iulai tuuaia ai Papalii i le faia o uiga mataga i tamaitai a’o galue ai i le Matagaluega o le Faamasinoga.
Taua e le Peresetene ua tele faaseā ma faitioga ua oo atu e faasaga i lea itulau ma ua faailoa foi iai latou le tulaga ua iai. O le taimi nei o loo tālia se tali atu a le Loabay Samoa i nei tuuaiga.
O loo maualuga le manatu o Papalii o le susuga ia Gago lea na faia ia tusitusiga. E le gata i lea o le a ave foi se tagi a Papalii faasaga i soo se tasi lava na fai sana faamatalaga i lalo o nei tusitusiga a le Loabay Samoa.
Na tuu atu foi se faaseā a lē sa avea ma Faamasino Sili i le J.A.W.S faasaga i lea lava itulau faasalalau.
