Ua opo, afisi ma faafuata e le vaega faaupufai o le faatuatua i le Atua Samoa ua tasi, le nofoa sa umia e le vaega e puipuia aiātatau a tagata, ina ua manumalo lo latou sui tauva le afioga Lautimu’ia Uelese Vaai, i le palota laititi sa alo iai le itumalo o Vaimauga 3 i le Aso Lulu ma le Aso Faraile na tea nei.
Ua umia nei e le faatuatua i le Atua Samoa ua tasi le 32 nofoa, o le vaega e puipuia aiātatau a tagata o loo agaia le faigamalo e 17 nofoa, ma sui e faipule e toatolu ua faamavae mai lea pati faaupufai lea o loo faatali i se finagalo o le faamasinoga pe talia le latou mau e fia tutu toatasi i le Palemene ae le lagolago i se pati faaupufai.
O le faaiuga o le palota laititi e pei ona faailoa e le Komesina o le ofisa o faigapalota, o le afioga Lautimu’ia Uelese Vaai, ua aloaia lona filifilia e avea ma faipule o Vaimauga 3, na ia maua le aofaiga o palota e 1,531.
O le sui faatu na tauva mo le vaega e puipuia aiātatau a tagata le afioga Samau Leatigagaeono Solitamalii Timani na ia maua palota e 1,082 ma le sui na tauva faatutoatasi le afioga Feagaimaalii Bruce Toomalatai Utaileuo e 106 palota na ia maua.
E 2,737 tagata na palota i le faiga filifiliga a Vaimauga, ae ua faailoa e le Komesina o faigapalota le afioga Tuiafelolo A John Stanley i le faaiuga aloaia, e na o le 2,719 palota na lelei ona fai, ae o le isi 18 na faaleaoga ona sa lē lelei ona fai.
E silia i le 4 afe fitu selau le aofaiga o tagata na lesitala i le lola a lea itumalo a o lei faia le palota laititi.
O le masina fou o Mati ua faatulaga e toe tauaofia ai le Palemene lea o le a faatauto ai ma le sui usufono filifilia mo Vaimauga 3.
