Ua avea le talimalo o Samoa i le taimi muamua i le fono a ta’ita’i o malo o le taupulega, ua avea ai foi ma taimi muamua o le a tulaueleele ai i lo tatou atunuu Palemia o Niu Sila ma Ausetalia talu ona filifilia e avea ma ta’ita’i o ia malo i le tuana’i o faigapalota a ia atunuu e lua o ni paaga totino a le malo o Samoa.
Ua faailoa i le polokalame o le fono a malo o le taupulega o le Aso Tofi o lenei vaiaso e taunuu ai le Palemia o Ausetalia o Anthony Alabanese ma Christopher Luxon le Palemia o Aotearoa Niu Sila.
O loo faatulaga mai i le polokalame o le malaga mai o le Tupu o Peletania i lona tulaga o le faauluuluga o Malo o le Taupulega, o le a iai le taimi faapitoa e feiloa’i ai ma le Palemia o Niu Sila a o iai i Samoa.
