O loo loma le taligamalo a Samoa ia Oketopa o le tausaga nei 2024, o le a afea ai le atunuu e le Tupu o Peretania ma lana Masiofo ona o le fono a Ulu o Malo uma o le Taupulega a Peretania.
Peitai o le faaiuga o le vaiaso ua mavae atu nei, na afea ai lo tatou atunuu e se tasi o tamaitai o se tina foi o se sui o le Aigatupu o lea Malo tele, sa mau paolo pe nonofo ma se alo o le Tupu Tamaitai ua tuumalo le alii Perenise poo se Aloalii o Prince Andrew the Duke of York.
O le afea o Samoa e le tina ia Sarah Ferguson poo le Duchess of York, o le auai i le faalauiloa o se auaunaga galulue poo se taskforce ua faaigoaina o le Women of Waste ae ta’u faapuupuu o le WOW.
O se taumafaiga o loo taulamua ai le faalapotopotoga a Samoa e patino le latou tautua i le pulea lelei o otaota lafoa’i poo le Samoa recycling waste management.
O le faalauiloaina o lea taumafaiga sa saunoa ai Sarah Ferguson e faailoa lona sao e lagolago ai taumafaiga uma i le faasaoina o lo tatou siosiomaga, e pei o le pulea lelei o otaota lafoai.
O lea faamoemoe o loo lagolago iai le UNDP ma le ofisa o le va i fafo o le Malo o Peretania faapea le ofisa o le atinae o Malo o le Taupulega.
O se faalauiloa na auai taitai o le tatou Malo ma sui o Malo i fafo.
O le mae’a o lea faamoemoe na avanoa ai le tamaitai o Sarah Ferguson e asiasi i le mafutaga a tina o le Ekalesia Agelikana, o se lotu Kerisiano na afua mai i Egelani i Peretania.
