O ofisa sinia o le pulega o le kamupani o telefoni ma fesootaiga a le Digicel i le Pasefika ma le Telstra International, ua latou faia se foai tupe e lima afe tala ma meataalo o tusi faitau ma isi oloa e aoga i le a’oa’oina o fanau ua sauaina o loo nonofo i le vaaiga a le Toomaga mo ē Puapuagatia.

O le faaiuga o le vaiaso ua mavae na afea ai le nofoaga o le Campus of Hope i Tuanaimato e lea aumalaga i le faamoemoe autu, e ofo atu le fesoasoani i ia fanau, ma ave iai le faamalosiau.

Faaalia i se pepa o faamatalaga o lea asiasiga na faailoa ai e ofisa sinia o le pulega a ia kamupani o fesootaiga i telefoni ma initaneti, le faaauau pea o le latou lagolago i galuega o loo faatino e le Toomaga mo le tausia o ia fanau a le atunuu.

E lē gata i le seleni na faameaalofa mo le tausiga o fanau sauaina faapea a latou tusi aoga ma meataalo ae ua foai foi e le Digicel Pacific ma le Teltstra International tablets e faaaogā e fanau e maua ai fesootaiga initaneti ia maua ai mataupu mo a latou a’oa’oga.