E tusa ma le 130 faigamalaga e le’i oo ananafi, ma e ono faaauau mai i le asō.
Saunoa le pule sili o le Ea Niu Sila, Greg Foran, o le delay poo le faatuai o vaalele e ono faaauau mo nai aso a o taumafai ai le kamupani vaalele e lē gata o faigamalaga ua mae’a faatulaga mo aso ta’itasi a o le taumafai i se auala e faataunuu ai pea faigamalaga aafia.
O le malolosi o savili i le tele o vaega o le atunuu ananafi o le mafuaaga lea o le aafia o faigamalaga.
Ua toe augani malosi mai Foran i tagata feoa’i e lē o moomia vave le malaga ina ia toe suia aso poo le fesuia’i foi o tickets mo credits a o mafai ai ona taofia e oo atu i le 12 masina.
E ese mai i le aafia o faigamalaga a vaalele, ua ta’ua mai le tapunia o le tele o auala faapea le faitau afe ua leai se eletise i le North Island, ae o le itu i Saute o lea e iai vaega na faamalosia le poloaiga o faalavelave faafuasei.
