O faafitauli e pei o auala o femalagaa’iga mo le auaunaga tau soifua mālōlōina i falema’i faaitumalo, i le togafitia o gasegase lē pipisi, ua maua nei le fofō e ala i le foa’i o taavale e iva mo le matagaluega o le soifua mālōlōina.
O le faletupe o le lalolagi, ma le agalelei o malo o Niu Sila ma Ausetalia ua auala mai ai lea foa’i i le tau atoa o ia taavale o ni van, e $877,500 tala.
Faaalia e le Minisita o le Soifua Mālōlōina i lana saunoaga faafetai mo ia taavale fou, o le tali lea i lu’itau o loo feagai ma tausi soifua ma foma’i i le faaooina atu o polokalame faalauiloa aemaise o le togafitia o tagata ua aafia i ma’i lē pipisi o se auaunaga o loo faatino e le auaunaga a falema’i itumalo uma i le atunuu.
O falema’i faaitumalo foi e fitu lea e 3 i Upolu ae 4 i Savaii o le a tofu ma taavale fou mo le latou galuega.
Ua faailoa e le minisita o le soifua mālōlōina le afioga Valasi Luapitofanua Toogamaga Tafito Selesele, o le tele o fesoasoani i le faigapaaga a lana matagaluega ma le faletupe o le lalolagi faapea malo o Niu Sila ma Ausetalia, o loo aumai ai Konesale poo consultant e iai o latou tomai ma agavaa eseese e fesoasoani i le matagaluega.
O lea foi faigapaaga o loo maua ai e le Malo o Samoa fesoasoani tau tupe mo le manuia o tagata lautele.
O le 75 pasene o tagata o le atunuu ua aafia i gasegase le pipisi ma o le 50 pasene ua maliliu laiti o ia gasegase e pei o le suka, toto maualuga, ma’i o le fatu ma le kanesa.
