O le tausaga nei ua atoa iai le 70 o faatasiga o fono faaletausaga a le sosaiete a alii ma tamaitai tausi soifua faauuina o Samoa, o se faatasiga tāua e toe matimati ai vaega tāua o lea tomai a’oa’oina ina ia siitia le galuega i ona itu uma auā le tautuaina o le atunuu.
O le Aso Tofi o lenei vaiaso na tatala aloa’ia ai lea fono faaletausaga e le ta’ita’i o le Malo le afioga i le tamaitai Palemia, ae sa auai foi le Minisita o le Matāgaluega o le Soifua Mālōlōina, faapea le Pelesetene o le sosaiete o alii ma tamaitai foma’i le Samoa Medical Association.
E lē gata ina manatua i le tatalaina o le fono nisi o alii ma tamaitai tausi soifua ua fai i lagi le folauga, ae na amana’ia ai foi le auaunaga ma le tautua a nisi o tausi soifua ua aulia tausaga o le soifua ua mālōlō litaea ai mai le galuega, ma o nisi o loo faaauau le auaunaga auā o loo maua pea le malosi.
Le afioga i le Palemia, Fiame Naomi Mata’afa i le tatalaina o le fono faaletausaga lona 70 a le sosaiete a tausi soifua faauuina o Samoa.
O le Aso Faraile le faaiuga o lenei vaiaso o le aso mulimuli lea o le fonotaga, o le a filifili ai se Pelesetene ma isi tulaga tofi o le Komiti Faafoe.
O le tausaga na te’a nei na tuumalo ai le faletua o Solialofi Papalii o se tausi soifua sinia sa tauaveina le tofi Pelesetene o le sosaiete.
