Ua faagasolo i le Aso Tofi o lenei vaiaso se asiasiga i le afioaga o Sili i Savaii ua silasila ai sui o le nuu i fale ta’ele ma faleui ua fausia e aiga e 64 mai seleni o faamanuiaga o galuega faavaitaimi, o loo malaga atu ai i Niu Sila ma Ausetalia tamafanau a le afioaga ua maua avanoa mo ia galuega.
O le susuga Faaolatane Iona o loo faauluulu i le sailia o alii ma tamaitai o le nuu o Sili e ave mo ia galuega, o ia foi o loo unaia malosi le aufaigaluega a le nuu ia tinou e faia ni atiina’e mo le faaleleia o le lotoifale o o latou aiga, ma o se tasi o faamoemoe ua tino mai o le siitia o le soifua lelei o aiga e ala i le tausia o le tumamā lautele i le fausia o fale ta’ele ma faleui o ni vaega tāua tele o le soifua maloloina.
Faaolatane Iona: “Mai lava i le amataga seia oo mai le taimi lenei, ona tilotilo lea i le ono masina muamua, poo le ā se mea e vaai i ai le nuu ma aiga o la e iai ni atina’e e faaaogā i ai le malosi o alo ma fanau ia e o. O le vaaiga mamao lava e tele ina tilotilo o la e maua tupe, e lē natia faalavelave fai, ia e le gata i lea o le tausiga o aiga i aso faisoo. O le ala lea na faatulaga ai le matou asiasiga muamua lenei, o loo ave la le faamamafa i le soifua maloloina o aiga, i le vaega lea o falelēta’ua vaeane le taeao, ma mea e gasese ai meaai ina ia mafai pea ona maua le vaega foi lele ona o lea lava tatou te i luga o faama’i. O le faatulagana la lena lea sa iai, lea sa fua i ai le asiasiga lenei e tatau ona faatinoina ma asia asiasiga a alo ma fanau. O le tilotilo foi lele i ai, o le tulaga e tatau ona iai se tupe e mafai e le tamaiitiiti ona faaalu i lana asiasiga. O le mea moni lava, e le mafai ona fai se fale telē i lenei ono, fitu masina e malaga ai.
Ae o se tilotilo i se tupe faaalu, lima afe ono afe, ina ia mafai ai ona faataunuu le asiasiga lea e pei ona iai. O le ala la lea na atofa ai le Aso Tofi, ina ia mafai ona fai le asiasiga atoa a tamaiti e 68 a le matou nuu o loo malaga i galuega faavaitaimi. O le asiasiga la lea o loo iai uma mātua, o taitoalua o nisi o uso ma tuafāfine o loo malaga, faatasi ai ma le saofaiga a le nuu, i latou o loo faatautaia le nuu i lenei taimi, o le pulenuu ma le sui tamaitai. O le mafuaaga lava o le aumai i totonu, e le gata i lea o faafeagaiga, se’i silasila foi i latou i le taumafaiga a alo ma fanau. E telē lava se fesoasoani a lenei polokalame i si o matou nuu ona o le tau atina’eina, ma e lē o nā ma le lāina, e toatele lava alo ma fanau e lē o iai ni galuega, ae ua aogā le polokalame lenei mo i latou, ua fetaui foi ma le anavatau o loo taumafai i ai le matagaluega, e aumai i tua i nuu ma itumalo polokalame e faatautai ai, ona o loo telē le manaomiaga i lea taimi ma lea taimi.”
Tipi: “Ua e ta’ua le tulaga o le taimi muamua lea ua fai ai se asiasiga i le atina’e lea e ave ai le faamuamua i le soifua maloloina. O lea foi e atagia mai i lou finagalo, e pei o lea e galulue a le to’a 68 lea i le taimi nei, po ua toe foi mai nisi, a o lea e lafo mai tupe ae faatino e o latou aiga le fuafuaga lea e iai le faamoemoe i le Aso Tofi?”
Faaolatane Iona: “Sa’o lelei le saunoaga Autagavaia. E tasi le matou team sa i le Mr Apple i Niu Sila, lea sa taunuu mai le Aso Sa lea na uma atu nei, o latou ia o lea ua amata ona faagaioia le matou asiasiga muamua lenei. A o le to’atele lava o loo iai pea i galuega faavaitaimi i le taimi nei, a o loo aumai seleni i o latou aiga e faatauta ai a latou asiasiga ma faagaioi ai, ina ia mafai ai ona atagia i le asiasiga le mana’oga lea e iai. O loo iai foi le matou polokalame sa talanoa uma ma i latou, o le tamaititi lava la ia e le mafai ona iai se asiasiga i le asiasiga lenei, o iinā foi la e fua mai ai lona auai i galuega faavaitaimi, o ia foi la e ta’u mai ai e lē o iai se faamamafa i avanoa ia e avatu e le tatou malo faapea foi i matou nei o loo faatautaia le polokalame i totonu o nuu.”
O se faatalanoaga ma le susuga Faaolatane Iona, o loo ta’iulu i le tapenaina o tagata faigaluega faavaitaimi auā tamafanau a le afioaga o Sili i Savaii. O le faaiuga o le tausaga ua faamoemoe e asiasia ai laoa ma maota o aiga o tagata faigaluega faavaitaimi o se tasi lea o fuafuaga mo le atiina a’e o aiga o le nuu e vaivai le tamaoaiga. O le afioaga foi o Safotu i Savaii i o latou alo foi ma fanau sa faatino ai lenei taumafaiga ma ua mautu ai laoa ma maota o nisi o aiga o lea foi afioaga. O galuega faavaitaimi ua maua ai taavale ma faatutū ai pisinisi laiti a nisi aiga i Samoa o fua aliali o faamanuiaga mai seleni o loo maua i lea polokalame a le Malo o Niu Sila ma Ausetalia.
