E silia i le ‘afa miliona poo le 600 afe tala le vaegatupe ua su ai e lē sa avea ma Loia sili a le Malo le afioga Savalenoa Mareva Betham Annandale, le afioga i le Palemia ma le Loia sili a le Malo e pei ona faailoa i pepa o lana talosaga ua faatō’ai i le faamasinoga sili a le atunuu.
O loo su e Savalenoa le afioga Fiame Naomi Mataafa ma le Loia sili i lana finauga e solitulafono le faai’uga na tuli ma faamuta ai lana galuega sa tautua ai i le Malo o le Loia sili. O le Aso Gafua o lenei vaiaso na faato’ā valaau ai mo le taimi muamua le talosaga lenei i le faamasinoga sili ma o le a toe valaau i le aso 27 o le masina fou o Iuni, e tālia ai se tali a i laua ua faatūtū i ai le su.
O le avanoa foi lea e fesoota’i ai le loia i Samoa a i laua ua tuua’ia i se loia mai fafo na te ta’ita’ia le finauga tetee a le itu ua faasaga iai le tagi a lē sa avea ma Loia sili. O se loia mai fafo o loo finauina le talosaga lenei ma o se mataupu o loo talosaga ai foi le itu tagi ina faia se iloiloga faaletufono poo se judiciary review o le faai’uga na faamuta ai lona taimi galue.
E pei ona silafia na tuli ese lē sa faauluulu iai le ofisa o le Loia sili a le Malo ina ua leai se faatuatuaga o le faigamalo a le Faatuatua i le Atua Samoa ua Tasi i le faatinoga o ona tiute o ia o le faufautua faaletulafono i le Malo.
