O le Aso Tofi i Samoa ae o le Aso Lulu lea i Amerika Samoa ua tatala aloaia ai le fono lona lima o le Atoa o Samoa i lenei vaiaso, e pei ona masii ai le usugafono mai le Malo o Samoa Tutoatasi ua afifio ai Minisita e toaono o le Kapeneta e aofia ai le Tamaitai Palemia, ma Ofisa Sili o pulega o nisi o matagaluega ma faalapotopotoga a le Malo.
O le tausaga nei ua faatulaga e na o le tasi ai le fonotaga o le a usuia i le va o taitai o faigamalo a Samoa e lua, e pei ona sa faaiugafonoina i le fono o le Atoa o Samoa sa usuia i Savaii ia Oketopa o le tausaga na te’a nei.
Ua faailoa i se pepa o faamaumauga mataupu o le a toe tuliloa i le fono o lenei tausaga e pei o tulaga i fefaatauaiga i le va o Samoa ma Amerika Samoa, o le toe asia o iugafono i mataupu tau femalagaa’iga e pei o le pemita fitu aso mo o tatou tagata e fia ulufale i le teritori ae faapea foi mo tagatanuu o Tutuila ma Manu’a e fia ulufale i Apia i le umi e fitu aso.
O atinae o faatoaga ma faigafaiva o le a toe asia foi, tulaga i avanoa faigaluega mo tagata mai Samoa i totonu o kamupani tuuapai’a i Tutuila, faapea mataupu i fesootaiga faatekonolosi ma tulafono.
E anoanoa’i isi mataupu i le faaleleia lava o sootaga o Malo e lua o le a toe tuliloa i le fono o loo faagasolo i Amerika Samoa.
O le Tamaitai Palemia o loo taitaia le usugafono a Samoa le afioga Fiame Dr Naomi Mataafa, o le Minisita o galuega tetele le tofa Olo Afoa Fiti Vaai, Minisita o faatoaga ma faigafaiva le susuga Laauli Leuatea Polataivao Fosi Schmidt, Minisita o le matagaluega o pisinisi alamanuia ma leipa le afioga Leota Laki Lamositele Sio, Minisita o le soifua maloloina afioga Valasi Luapitofanua Toogamaga Selesele, ma le tamaitai Minisita o le matagaluega o tina ma tamaitai atinae o afioaga ma aga fesootai afioga Mulipola Anarosa Ale Molioo.
O le Ofisa Sili o le matagaluega o aoga, Ofisa Sili o le matagaluega o faatoaga ma faigafaiva, Ofisa Sili o le nofoaga o suesuega faasaienisi i Nafanua, Ofisa Sili o le matagaluega a le Palemia ma le Kapeneta, le matagaluega o le va i fafo ma fefaatauaiga, Ofisa Sili o le matagaluega o le tiute ma tupe maua, Ofisa Sili o le matagaluega o alamanuia pisinisi ma leipa, Ofisa Sili o le matagaluega o puna’oa faalenatura ma siosiomaga, Faatonu Sili aoao o le soifua maloloina, o le Ofisa Sili o le matagaluega o faamatalaga ma fesootaiga faatekonolosi ma le Ofisa Sili o le matagaluega o felauaiga ma galuega tetele a le Malo.
O loo malaga ai foi le sui o le ofisa o faamatalaga ma galuega sooupu a le Malo le Press-secretariat.
O le faaiuga o le vaiaso e mae’a le fono o le Atoa o Samoa ona toe taliu mai lea i Apia o le usugafono a le tatou Malo.
