Ua tau faai’ui’u lenei tausaga ma ona galuega ae o se tala fiafia mai le faalapotopotoga o fale a le atunuu poo le Samoa Housing Corporation, le naunau o le malo e una’ia tagata o le atunuu e fausia ni fale lelei e nonofo ma faamautū ai, e pei ona faamatuu atu e le malo i lea faalapotopotoga le vaegātupe e 6 miliona tālā e avanoa ai le atunuu e talosaga i ni nonogatupe poo aitalafu.
I se pepa faalauiloa o lea fuafuaga ua faailoa ai e le faalapotopotoga o fale a Samoa, o aiaiga o ia nonogatupe e maualalo le tului poo le interest, e mafai ona fetuutuuna’i le toe totogiina o se nonogatupe, ma e faamuamua e le faalapotopotoga talosaga mai tagata o loo fia fausia ma umia se laoa ma se maota mo le taimi muamua.
O lea fuafuaga a le malo e pei ona faailoa i le pepa o faamatalaga faalaua’itele mai le faalapotopotoga o fale a Samoa, o se fuafuaga a le malo e atagia ai le faanaunauta’iga e siitia le tulaga o aiga ma nuu ma ia mafai ona ola ma soifua atina’e.
