O le ogatotonu o lenei vaiaso o le a faalauiloa ai i le taulaga i Apia aufusu ma tama fusu e toa 50 o le a tausinio i faipelega a le kalapu taalo a le Malisi, o le a faia i le Aso Faraile o le vaiaso nei.
O se solo mai le ofisa autu o leoleo ma agai mai i luma maota o le Malo o le a faalauiloa ai tama fusu faapea ai ma alo fusu o le atunuu le afioga Tupuola Ato Faoagali ma Marion Ah Tong, o le faia a la fusuaga faapolofesa mo le taimi muamua i Samoa.
O le Minisita o A’oga taaloga ma aganuu le afioga Se’ula Ioane ma le Peresetene o le kalapu a le Malisi le afioga Aumua Ming Leung Wai o saunoaga ia o le taeao o le Aso Lulu o le a faafeiloai ai au fusu, ae o le Aso Tofi o le fuaga pauna ma sauni ai loa i le tausunioga i le afiafi o le Aso Faraile.
O se tasi o tausinioga ua faatulaga mo lenei vaiaso o le tauvaga siva a le kalapu ailao afi a Samoa o loo faauluulu ise tasi o tamalii sa tele tausaga o ia faatinoina lea siva a le atunuu le afioga Leota Lene Leota.
O le tauvaga lea ua atoa ai le 20 tausaga o faagasolo lea faamoemoe ma o le ogatotonu o le vaiaso e amata ai, ae taualuga i le sailiga o le siamupini i le faaiuga o le vaiaso.
Ua faamaonia mai e le afioga Leota Lene o le nofoaga i le eleele fou a le pulega o tagata tafafao le tourist village o le a faia ai le tauvaga, ma ua tapena le kalapu siva ailao afi e tuuina atu ai ma le latou tautua o le faleaiga ma le nofoaga e maua ai le vai taumafa suamalie ma le avamalosi.
O le amataga o le tausaga nei na faalauiloa ai le tauvaga siva ailao afi lenei, ae sa faatali se taimi e toe tatala ai auaunaga uma masani e faatino ai e pei ona toe tatala tuaoi o Samoa ma faamuta puipuiga uma o le faama’i.
