Ua faamauina i lipoti a le leitio faavaomalo a Niu Sila, i le tuuina mai o faamaumauga a le Cancer Control Agency, le ono siitia ai o le numera o tagata e faamaonia le maua i le gasegase o le kanesa i tausaga ta’itasi i le 50%, mai le 30,000 o loo iai i le taimi lenei aga’i i le silia atu ma le 45,000 i le tausaga e 2044.
Ta’ua e ui ua vaaia le siitia o le pasene o tagata ua toe manuia mai lea gasegase faigatā, e pei ona iai le 15% i totonu o le 20 tausaga ae o loo vaaia pea le tiloilo i auala e saga siitia ai lea numera.
Faaalia o lea maualuga e mai le sologa lelei o siaki ma le tele o togafitiga o loo faatino.
I lea lipoti o loo faamauina ai, e maualuga teisi lava numera o Maori e maliliu mai lea gasegase nai lo o tagatānuu Pasefika, ma e maualuga uma i latou nai lo o tagata papa’e.
Faamauina o le tele o matāupu o loo māua ai e mafai ona togafitia ma taofia mai le ono aafia ai o le tagata, pe a faatupula’ia o faalauiloa i le taofia o le ulaula tapaa, o le taumafa ‘ava, o le tele o meaai taumafa, o faatino ai o faamalositino, ae faapea foi le puipuiga mai le lā.
I le mafai ona faatino ai ia vaega o le a mafai ona taofia ai le oo atu i le 8000 aga’i i le 14,000 o tagata mai le ono ma’i i le kanesa i tausaga ta’itasi.
O loo ta’ua o gasegase o le kanesa o loo tele ina maua ma faamaonia i le to’atele i le taimi nei o kanesa o le porosetate, kanesa o le susu, kanesa o le taufale, faapea le māmā ma le kanesa o le pa’u.
Puna o Faamatalaga: https://www.rnz.co.nz/news/national/581467/cancer-diagnosis-numbers-set-to-skyrocket-by-50-percent-over-next-two-decades
