A itiiti mai e 466 tagata ae 100 aiga o alala ma faamautū i le afioaga o A’ufaga o le a latou maua le suavai mamā ma lelei, mai le foa’i a le malo agalelei o Iapani.
O lea foa’i tupe e 319 afe tala Samoa o le a fausia ai se tane vai tele e mafai ona teuina ai le 100 afe lita o le suavai mamā, fausia ai se pa e puipuia ai le tane vai, ma faaleleia ai le auaunaga o le suavai o loo maua e aiga o le nuu i aso ta’itasi.
O A’ufaga o se tasi lea o afioaga o le atunuu o loo avea ma sui o le polokalame o suavai tuma’oti, o loo pulea ai lava e le nuu lona suavai mamā mo le faaaogāina.
O le foa’i a le malo o Iapani e ala i lana polokalame fesoasoani mo atina’e e manuia ai tagata lautele, ua mae’a sainia ai e le sui o lea malo i Samoa le maliega ma sui o le nuu o A’ufaga.
Faaalia e le Amepasa o Iapani i Samoa o Senta Keisuke, o le a faaauau pea le polokalame fesoasoani a lona malo, ina ia maua ai pea e nuu ma afioaga o le tatou atunuu aemaise o tatou tagata fesoasoani e fesoota’i i le lo latou soifua manuia.
