Ua amata nei se faamasinoga i le itumalo o Whangārei faasaga i ni alii se to’alua ma se tama’ita’i o loo tuua’ia i le sauāina mo le tele o tausaga o ni fanau se to’alua e i lalo o le 12 tausaga le matutua.
I lipoti mai le leitio faavaomalo a Niu Sila o loo tapu ona faalauiloa igoa o i latou o loo tuua’ia ma molia nei, ma e faaalia o moliaga e 34 e aofia ai le faia ma le faamoemoe o ni manu’aga ogaoga i le tino o se tagata, o le lē lelei ona fai o se tamaitiiti, faaoo manu’a e faaaogā ai se ‘au’upega, faapea le faaoo manu’a i se tamaitiiti.
Faaalia e le faamasino, tulaga o le fasi pe faaoolima o ia tagata i fanau i le tele o taimi, lē fafagaina i la’ua, faamalosi le momoe ai i fafo o le fale e aunoa ma ni lavalava ma le tele o sauāga na fetaia’i ma nai fanau; e pei ona tuua’ia le aafia ma mū ai o le lima o le isi o tamaitiiti ina ua tuu e se tasi o tagata matua lona lima i le heater.
Ta’ua i faamatalaga, o ia fanau laiti na tuu i lalo o le vaavaaiga a le ulugalii e le Oranga Tamariki, talu ai o se sootaga faaleaiga a fanau ia i la’ua ae peisea’i o se isi o tagata na nonofo faatasi ma lea ulugalii na faaopoopo atu ai foi ana ia faiga faasolitulafono o le sauāina ma le faileagaina o nai fanau ua aafia nei.
Faamatala e le loia Crown lawyer, Ben Bosomworth i le faamasinoga, e pei o se vaisiū ma se faatinoga e mafuli iai ia tagata e faatino pe a fetaia’i ma ni faafiatuli, o le faaoolima i nai fanauiti.
E aofia ai le fasi, faaaogāina o le fusipa’u, o soo se mea faitino lava ma laau.
Ae i le mea mata’utia na maofa ai manatu, o le tia’i ai e ia tagata o fanau i luma o se tasi o lālā a le Oranga Tamariki i Kaitāia, ma le faamatalaga a le tama’ita’i ua lava lea, o se manatu ua faaalia mai ai lo latou lē fia tausia o ia tamaiti.
Faamauina e ala i loia o loo tūtūla’i mo i latou o loo tuua’ia le teena ai o moliaga uma.
O loo faaauau lea faamasinoga ma o loo laumanu’ia le auai o sui o le Oranga Tamariki e molimau i lenei matāupu e aofia ai ma nai fanau ua aafia.
Puna o Faamatalaga: https://www.rnz.co.nz/news/national/584552/far-north-child-abuse-trial-trio-face-34-charges-of-violence-neglect
