I le silia ma le 12 masina talu ona faamavae lē sa avea ma komesina o le ofisa o le Komisi o faigapalota, o le faaiuga o le vaiaso na tea nei na faailoa ai le mae’a faia o le filifiliga o se komesina fou o lea auaunaga taua a le Malo, ma ua faamaonia ai e le kapeneta le avea o le afioga Tuiafelolo Alexander John Stanley, ma Komesina filifilia na te pulea ma vaaia le ofisa o le komisi o faigapalota mo le umi e 5 tausaga.

Ua faailoa i se pepa o faamatalaga faalauaitele mai le ofisa sooupu o le Malo o Tuiafelolo Alexander John Stanley, ua silia ma le 30 tausaga o galue ma tautua i le Malo i nisi o matagaluega e pei o le Komisi o Galuega a le Malo le PSC, Matagaluega o le Soifua Maloloina, ma le faalapotopotoga o le malosi faaeletise e pei ona sa ia vaaia ma pulea le vaega o auaunaga lautele le corporate service.

O se tamalii o loo umia faailoga o le Master i tomai ma galuega tau pisinisi, faailoga o le Bachelor i tomai tau pulega, ma faailoga tipiloma i le vaega e ta’ua o le Public sector management ma tulaga tau aoaoga.

Ua lava lona silafia i tiute faataitai aemaise o ona tomai ma agavaa e tapena ai fuafuaga mamao ma le faagasologa o tiute e faatinoina ia taunuu soo se galuega o fuafua, o le isi lea o mafuaaga o lona filifilia e pei ona faailoa i le pepa o faasalalauga faalauaitele.

Ua lava foi lona silafiai le Tulafono o Faigapalota o le tausaga e 2019 aemaise o tulafono uma e faagaioi ma faamautu ai le tutoatasi o faaiugafai a le Ofisa o le Komisi o Faigapalota.

O se tasi lenei o faauluuluga o auaunaga a le Malo ua faitau masina o talia se faaiuga i le tuanai o le faigapalota tele ia Aperila o le tausaga na tea nei, faapea palota laiti ia Novema o le tausaga ua mavae na mafua i faaiuga o tagi o tuuaiga o solitulafono na mafua mai i lea palota tele a le atunuu.

O lē sa avea ma komesina o faigapalota, le afioga Faimalomatumua Matthew Lemisio, na faamavae mai le tofiga ia Novema o le tausaga na tea nei.