A o iai i Samoa i le vaiaso ua mavae le tamaitai Minisita o le ofisa o le va i fafo o le Malo o Siamani ona o le toe faafoi mai i le atunuu o se tasi o vaega tāua o le vaatau Samoa o le taumualua na ave faasolitulafono e nisi o fitafita o lea Malo i le tausaga e 1888, o le avanoa foi lea o le minisita na ia faatino ai se tasi o agalelei mai lona Malo, o se foa’i o masini ea malulu, o masini komepiuta ma masini e faia ai kopi poo photo-copy machines mo le kolisi o Falealili.
O le tau o lea foa’i e pei ona faailoa i se pepa o faamatalaga e $28 afe tālā Samoa.
O le faamoemoe o le foa’i ia siitia le tulaga o a’oa’oga a le fanau i tulaga faatekonolosi e maua ai fesootaiga televavave auā suesuega o mataupu o loo a’oa’oina e fanau a lea kolisi maualuga a le Malo.
Ua maua le 32 o poloketi eseese i Samoa ua fesoasoani iai le Malo o Siamani o se tasi o Malo sa pulea faakolone Samoa i le tele o tausaga ua tuanai.
