Mai le valu i le taeao e oo i le sefulu o le po o le Aso Toonai na tea nei, sa faatino ai le faamoemoe o le pulega o le taaloga Lakapi Liki a Samoa i lana sailigatupe e ala i se TV ma le Leitiofoni, e 238 afe tala le seleni na maua i le aao mafola o le atunuu ma pisinisi eseese.
O se faamoemoe sa lagolago malosi e le faletelevise o le TV1 i Mulinuu o se paaga a le Lakapi Liki a Samoa. I le tele o foai tupe sa tuuina atu, o nisi o pisinisi na latou aao mafola i ni foai tetele mai le 5 afe i le 10 afe tala, ae o le kamupani lafo tupe faamomoli o le Pacific Ezy e 20 afe tala le latou foai.
Na aao mafola foi lea kamupani a o tapena le Ipu o le lalolagi mo taumafaiga a le aulakapi liki a le atunuu le Toa Samoa na latou foai ai foi le isi 20 afe tala.
Ua faailoa e le Peresetene ma le Lakapi Liki a le atunuu, e ui na mae’a le faamoemoe i le Aso Toonai na tea nei, ae o loo tatala pea le avanoa mo nisi e fia foai i tapenaga o le malaga mai i lo tatou atunuu o lana aulakapi liki o le Toa Samoa, lea e taunuu i le afiafipo o le Aso Lua asau le aso 27 o Tesema.
