E 23 afe se tinoitupe, o ututau, pauta faasāina o le aisa, o uati, asoa ma filifili auro na maua i se osofaiga a leoleo i se fale o se aiga i Puipaa i le afiafi o le Aso Lua o le vaiaso nei.
O le tau o aisa na maua i le osofaiga pe a faatau e tusa ma le 50 afe tala.
E toa sefulutasi tagata ua taofia ma molia e leoleo i le iai o ni o latou aafiaga i le umia o ia aisa poo le methamphetamine.
O le manuia o lea osofaiga a leoleo o se molimau ola lea o le faamuamua pea e lea matagaluega tāua a le Malo o le malupuipuia o le soifua o o tatou tagata mai faiga solitulafono e fesootai i laau o fualaau ma pauta faasāina.
O le nofoaga na faatūtū iai le galuega a leoleo ma maua ai ia aisa, o tupe ma ututau e tu lata i le alatele autu o le Malo o loo agai ai i le malaevaalele ma le uafu i Mulifanua faapea le agai i le taulaga o Apia.
