E lē o toe faigofie ma taugofie le soifuaga ua iai Samoa ma le lalolagi i lenei taimi o le faama’i Koviti-19. Ua faaopoopo iai ma le sii taua o Rusia i le Malo o Iukureni ma ua atili masau ai le felelei a’e i le vateatea o le tau o suauu ma penisini ma ua ‘alofaga iai ma Malo i le mafuaaga o le sii maualuga o le tau o oloa, peitai e lē tuua ai pea le aao mafola ma le agalelei o le kamupani lafo tupe faamomoli o le PacificEzy Money Transfer, i le 22 afe tala ua faatupe ai togiga lakapi fou mo aulakapi ta’ito’afitu o le Tepatasi mai Aleipata ma le ‘au a Safotu mai Salafai.
O aulakapi foi ia e lua ua sponsor pe lagolago e lea kamupani agalelei e pei ona sa tauaao le foa’i i faia’oga, ma faipule o itumalo o loo faamaopoopo ai le atina’e o le lakapi mai ia afioaga e lua i Upolu ma Savaii. O le ‘au a le Tepatasi na faaalia e lo latou sui, o se taimi muamua lenei talu ona faavae le latou ‘au ua maua ai se kamupani ua iai le lotoalofa e lagolago ai a latou tapenaga i taamilosaga lakapi ta’ito’afitu i totonu o le atunuu.
O se sui o le aulakapi ta’ito’afitu a le Tepatasi mai le itumalo o Atua. O le faletalimalo o le Taumeasina Resort na faia ai le sauniga na tauaao ai togiga fou a le Safotu ma le Tepatasi PacificEzy.
