E $212.4 miliona le konekarate fou ua sainia nei e le alii lakapi Samoa mai Hawaii, o Tua Tagovailoa ma le pulega a le kalapu lakapi a le Miami Dolphins e faaauau ai ona taalo mo le Dolphins mo le isi 4 tausaga.
O lenei konekarate fou ua sainia e Tagovailoa, ua lona tolu ai nei o ia i le faasologa o tama taaalo pito sili ona maoa’e o latou totogi (third-highest paid quarterback) i le NFL poo le National Football League a Amerika.
O se faatatauga e tusa e $53.1 miliona i le tausaga, ma ua lona tolu atu ai o ia i isi alii taaalo o Trevor Lawrence mai le Jacksonville Jaguars ma Joe Burrow mai le Cincinnati Bengals, ma o lenei maliega ua muai faamautinoa le $167 miliona.
O le konekarate e $212.4 miliona i tālā Amerika, e tusa lea ma le $363.3 miliona tālā Niu Sila ae $593.6 miliona i tālā Samoa, o se aofaiga maoa’e ua faamanuiaina ai taumafaiga a lenei alo o Samoa.
O lenei konekarate ua tulai mai ai o se taimi muamua lea ua saini ai e se tagata afeleti faapolofesa na fanau ane i totonu o Hawaii, se konekarate sili ona maoa’e le telē o lenei seleni ua ofoina ai, ma ua tulai mai ai foi, o le alii o Tagovailoa, o se uluai tamafanau a Samoa, ae o se tamafanau foi a le Pasefika ua oo sona totogi i se tulaga sili ona maoa’e i lenei foi talutalufou o taaloga a le NFL.
O loo ta’ua foi i lipoti, o se konekarate pito sili lea ona taugata i le talafaasolopito a le kalapu o le Miami Dolphins ua ia sainia ma se tama taalo.
O Tua Tagovailoa ua 26 tausaga o lona soifua, na fanau i le aso 2 Mati 1998, i Ewa Beach i Hawaii, ma o loo taalo i le taimi nei i le Miami Dolphins (#1 / Quarterback) ae o lea la ua toe saini nei ina ia faaauau ai i le Fins mo le isi 4 tausaga.
O le tausaga e 2020 na amata taalo ai Tagovailoa i le Miami Dolphins ae muamua atu i le 2017 sa taalo i le Alabama Crimson Tide i ‘au a kolisi maualuluga.
