$200,000 le foa’i a le SISDAC mo le vaega faaupufai a le FAST

March 25, 2025
Samoa
Tusia: Manulelei Coe

572

E $200,000 le foa’i tupe ua tauaao atu e le Peresitene o le Ekalesia SISDAC, susuga Pastor Alaimoana Willie Papu, i le Ta’ita’i o le vaega faaupufai a le FAST, le susuga i le Laaulialemalietoa Leuatea Fosi Schmidt, auā fuafuaga faataatitia a le vaega faaupufai.

O se lipoti a le Talamua Online News lea na faailoa ai lenei feiloa’iga, ma sa auai atu i lenei sauniga faapitoa sa faia i le faletalimalo a le Ekalesia i Vaitele, le Anavamoana Hotel e lē gata i le Peresitene o le SISDAC, o le Ta’ita’i o le FAST party, o le afioga i le Fofoga Fetalai, nisi o sui faipule o le FAST, ae faapea foi i nisi o sui sinia o le ekalesia.

I lana saunoaga na tauaao atu ai lenei seleni tele, na ta’ua e le Peresitene o le SISDAC, o le ala o lo latou fiafia e faia lenei foa’i, ona e iai vaega e talitutusa ai le silasila mamao faaleagaga a le Ekalesia, ma le manulauti a le FAST party, i lo latou taumafai e tula’i mai ma sa’ili le amiotonu ma le faamaoni, ma ia maua e tagata uma le autasi i lo latou faatuatua i le Atua.

I lona ta’ua o le tulaga fevaevaea’i o loo iai faiga faapolokiki i totonu o le atunuu i lenei taimi aemaise foi i le lalolagi atoa, na toe ta’ua ai e Pastor Alaimoana Willie Papu upu a lē na faavaeina le Fulton Adventist University College lea sa a’oga ai, ma na faapea mai lena tagata iloga, o le mana’oga pito sili ona tāua lea ua iai i le lalolagi i aso nei, ina ia mafai e tagata ona tula’i atu e fai le mea tonu poo le amiotonu.

O lana lu’i foi lea mo le vaega faaupufai a le FAST, ina ia tutū faatasi i le faatuatua ma le amiotonu i le Atua, o inā e maua mai ai lo latou malosi.

Sa talifuaitau atu iai le Ta’ita’i o le FAST, le Afioga Laaulialemalietoa Leuatea Polotaivao Fosi Schmidt e faafetaia le foa’i ua faia e le ekalesia, ma na ta’ua ai e Laauli, o le a taumafai malosi le vaega faaupufai e faia le mea silisili latou te mafai, ina ia faamautinoa o le a latou maua le malosi’aga e faavae ai le faigamalo pe a faatino le faigapalota lautele lea ua lalata mai.

Sa faamalamalama foi i lea afiafi e le susuga i le Peresitene o le SISDAC, e lē o se mea fou i le ekalesia le faia o ana foa’i tau tupe faapea, sa latou faia foi i isi vaega faaupufai i taimi ua mavae.