E to’a sefuluiva A’oa’o ma o latou faletua ua maea tausaga sa a’otauina ai ile Kolisi Faafaifeau i Malua a le Ekalesia Faapotopotoga Kerisiano Samoa, ua avea nei ma Faifeau Samoa poo le FS, ina ua faauu ile maea o tausaga e lua ma le tolu sa galulue ai i nisi o auaunaga i totonu o le ekalesia, e pei o le avea ma faiaoga i nisi o kolisi a le ekalesia faapea totonu o le Kolisi Faafaifeau.
O nisi foi o faifeau ua faauu ua maua tusi faamaoni o le Faifeau Samoa o loo galulue ile tausiga o nisi o aulotu. O le aso Toonai na tea nei na faatumulia ai le Malumalu o le Iupeli i Malua i usugafono o le fono tele faapea aiga o faafeagaiga ua faau’u ile sauniga na tauaao atu ai o latou tusi faamaoni o le avea ma faifeau Samoa.
O lo latou taunuu atu i lea laasaga ua mafai ai ona latou faatino nisi o sauniga e pei o le sakalameata o le faaipoipoga, faia o sauniga o maliu faapea sauniga o le faamanatuga.
O i latou ua ausia lea laasaga taua o le olaga faafaifeau a le EFKS, i faafeagaiga ma o latou faletua o le susuga Charlis Pupi, Clarke Tusani Stowers, Fa’alefu Tumatalie, Faleali’i Afamasaga, Falesefulu Falesefulu, Fatilua Fatilua, Faulalo Kennar, Iona Lea’ana, Susuga Keresoma Aloalii Seuala, susuga ile faifeau o Kilepoa Ioane, susuga Letaulau Poufa, susuga Mathew Simati, susuga ile faifeau i a Oli, Onosai Nofoa’iga, susuga Peia Lesatele, susuga Suafa’i Soliola, susuga Sunita, susuga Tutoatasi Toalima, ma le susuga Valoaga Ropati.
