O le ogatotonu o Novema lea ua faaataata mai ae e le o mautinoa e toe foi ai fanau aoga o aoga tulagalua

O le aso 15 o Novema lea na faailo mai e le minisita o aoga, Chris Hipkins mo vasega e oo atu i le vasega 8 i totonu o Aukilani ma se vaega o Waikato

O Aukilani ma Waikato o lea ua tutusa nei i le lapataiga vaega 3 phase muamua e pei ona alafai mai ai Waikato i le taeao nei, ma o le iai pea i lea vaega e le o mafai ona toe foi fanau aoga

E le’i iai se tala poo le a le tonu o vasega 9 ma vasega 10, pau le saunoaga a Hipkins o loo vaavaai iai e toe foi vasega nei i se taimi vave

E eseese manatu faaalia i le faasilasilaga ua aumai e le malo, ma ao taoto o se aso e le o mautinoa ua iai manatu o le ave o vasega e faia i fafo o potuaoga e tuuitiitia ai le pepesi o le faamai poo le vaevae foi o fanau aoga e o atu i aoga i aso taitasi o le vaiaso

Saunoa foi Dr Jin Russell o se tasi e galue i le falemai o tamaiti i Aukilani i tala a le Newshub, o le tulaga maualuga o le lamatia o le toe tatala o aoga e le o fanau, ao le aafia ai o tagata matutua o o latou aiga e le o faia tui