O le faaitiitia o le faalagolago o Samoa i le faaaogaina o suauu mo le auaunaga o feoa’iga i taavale afi, o le a mafai ona faaitiitia ai kasa kaponi e faaleagaina ai le ea, ma lamatia ai le ola lau usiusi o laau o loo puaina mai i fafo le okesene lelei e maua ai le soifua lelei o tagata.
O le masina o Aperila o le tausaga nei o le a amata ai ona faagasolo se taumafaiga e fesootai ma suiga o le tau, e ala ise fesoasoani a le Malo o Iapani o le a faatupe ai galuega ma polokalame mo le faaitiitia o le faalagolago i le faaulufale ile atunuu o suauu mo taavale afi, ae faaaoga auala o le ola faanatura o laau e mafai ona puipuia ai le siosiomaga ma fesoasoani e taofia ai kasa kaponi e faaleagaina ai le ‘ea o loo manavaina e tagata soifua.
E 15 tesimale 5 miliona tala tupe Amerika o le a maua e Samoa e faatino ai lea taumafaiga ma o se fuafuaga ua iai le talitonuga o le a siitia ai le sao o Samoa i taumafaiga e ala i polokalame o loo faatino e atunuu o le lalolagi mo le faasaoina o le tatou paneta mai suiga tetele o le tau.
