E to’a sefulufā A’oa’o o le vasega faai’u aso o le Kolisi Faafaifeau i Piula ua mae’a le fā tausaga o a’oa’oga ma ua faauu ma o latou faailoga o le Tipiloma o le Mataupu Silisili.
Na faailoa e le Pule o le Kolisi Faafaifeau a le Ekalesia Metotisi i Samoa ma atunuu i fafo le faamanuiaina uma o alii A’oa’o o le vasega faai’u aso i le faauuga a Piula na faia i le Aso Toonai na te’a nei.
Na faailoa ai foi ma le faamanuiaina o ni faifeau se to’alua o le ekalesia i le faailoga o le Master of Theology, o le faauuga muamua lea a Piula ua ausia lea faailoga maualuga. Sa faamanuiaina uma foi le ‘au faauu i tusipasi ma isi faailoga maualuluga.
Le susuga i le Pule o le Kolisi Faafaifeau i Piula susuga i le faifeau Professor Dr Mailo Mosese, i se vaega o lana lipoti faaletausaga mo le kolisi faafaifeau a le ekalesia Metotisi i Samoa ma atunuu i fafo.
O le faauuga o se tasi o vaega tāua i le polokalame a le ekalesia i tausaga ta’itasi, a o le’i usuia le Koneferenisi tele e pei ona faagasolo i le vaiaso nei i le laumua o le ekalesia i Fogaa i Faleula.
