O le tinā talavou 23 tausaga le matua o Sophia Ah Mann ua amata tuli nei lona faasalaga 12 masina i le falepuipui i Tanumalala, ina ua ioe i moliaga e lua o lona umia o le pauta faasāina o le ‘aisa.
O faamaumauga a leoleo o loo faailoa ai o Novema o le tausaga na te’a nei ina ua alu Sophia e asi lona to’alua o loo nofosala i le toese i solitulafono tau fualaau faasāina, na maua ai o ia faaulufale i le falepuipui ni taga pepa iila laiti o loo iai le ‘aisa.
O le taimi na su’eina ai lona tino na maua ai nei pauta faasāina.
Na su’e foi lana taavale ma maua ai foi tagapepa iila laiti e lua o loo iai lea pauta faasāina.
O le tasi lea o solitulafono ua saoasoa tele ma ua talosaga ai leoleo i Samoa i le Komesina o leoleo a Niu Sila mo se fesoasoani i le latou galuega o loo sa’ili ai nofoaga o loo faatino ai le umia ma le faaaogāina o nakoti poo fualaau faasāina.
O le tinā ua nofosala nei i le falepuipui sa galue o se tausi soifua i le Matāgaluega o le Soifua Mālōlōina.
O lana talosaga sa finauina ai le faapafala o se faasalaga e aunoa ma le faamaonia o ona moliaga, ona o le manumanuga i aafiaga o lana galuega faatausi soifua na teena e le faamasinoga.
