E selau tala le sala tupe ua tuuina atu e leoleo i le Minisita Lagolago o le Matagaluega o Leoleo, Falepuipui ma le Ola Toe Fuata’ina, ona o le aafia o se vaega i luma o le taavale a le Malo o loo faaaogā e le Minisita lagolago le afioga Fepulea’i Faimata Su’a, ina ua tifa i tua le taavale ma se vaega o le ala laupapa fou i le Loto o Samasoni i Apia.
O foliga o vaega tonu o le pikiapu na aafia e pei ona iloa i ata sa salalau i luga o le api o foliga, o loo omo se vaega o le apa lata i moli o le pito i luma. O le ata o le taavale na pu’e e se isi i le mea pu’eata o le telefoni e lē o iloa ai le numera poo le number plate. O le faamatalaga mai le Komesina o Leoleo le susuga Auapaau Logoitino Filipo, o le taeao o le Aso Gafua na te’a nei na tula’i mai ai le faaletonu i le taavale a le Minisita lagolago.
Sa ia faailoa sa logo le ofisa e le minisita lagolago ma faailoa iai le mea ua tupu i lana taavale ma faapena ona aga’i iai Malu o le Malo ma faia su’esu’ega. E leai se isi taavale na aafia ai pe na lamatia ai foi le ola o se tagata. O le ala laupapa fou lea i le Loto o Samasoni sa fausia i se fesoasoani a le Malo o Ausetalia, ma o loo iai ma le laupapa o tusia ai se lapata’iga ina ia faaeteete taavale i taimi o timuga ona e maseesee.
E lē o faailoaina e le Komesina pe na timu le taeao lea o le Aso Gafua ua mavae, ae ua faaalia e Auapaau o le mae’a o su’esu’ega na faia ai le faai’uga a leoleo e molia le minisita lagolago i le ave taavale faatamala careless driving, ma o se moliaga e mafai ona tuusa’o loa iai le sala tupe e selau tala e aunoa ma le ave i le faamasinoga. Ua faaalia e le Komesina o leoleo o loo faatali le tuuina atu o le salatupe i le Minisita lagolago o le latou matagaluega pe a taliu mai i le atunuu sana malaga o loo ia tuua ai Samoa mo Amerika.
