Ua aumai i auala o fesoota’iga faaonaponei e ala i le api o foliga anapo se finagalo o le Faipule o Gagaifomauga 3 le Susuga Laauli Leuatea Polataivao Fosi Schmidt, ua ia faailoa ai e le’i faia sana faamavaega mai lona tofi Minisita o le Kapeneta.
Ua ia faailoa ai foi e lē faamavae ae o le a faatali i se faai’uga a le tamaitai Palemia.
Ua faailoa e Laauli i lea faasalalauga tusitusia ua sauni e talia poo le ā lava le faai’uga e tuuina atu, ma tapena ai loa isi laasaga mo le lumanai.
Faaalia e Laauli e mamā o ia ma tuua’iga uma e pei ona iai moliaga a leoleo.
O le faato’ā aumai lea o se finagalo faalaua’itele o le faipule o Gagaifomauga 3 talu mai le Aso Gafua o le vaiaso nei na salalau ai faamatalaga ma lipoti ua fautuaina e le Palemia le faamavae o Laauli mai le tofi Minisita o le Kapeneta, e tālia ai se faai’uga a le faamasinoga i ona moliaga.
O le finagalo faalaua’itele o le tamaitai Palemia le Afioga Fiame Dr Naomi Mataafa na aumai i le Aso Faraile ua mavae lea na faia ai moliaga a leoleo faasaga ia Laauli, na ia faailoa ai e lē faatauvaa le molia o se Minisita e ui e lē o se moliaga tau i le tofiga, ma o le a lē avea foi le aafia o le tofiga Minisita o Laauli e tulaga ese ai le faatinoga o le faagasologa o le tulafono, i ni soligatulafono.
