O le pa o se pamu penisini na afua ai se afi tele na sasao ane i le ogatotonu o Yemen ua maliliu ai a itiiti mai pe to’a 15 tagata e pei ona faamaonia mai e sui o le soifua mālōlōina i lea atunuu.
O le faalavelave na tupu i le faai’uga o le vaiaso i le itumalo o Zaher ma pe ā ma le 67 le aumanunu’a e aofia ai ma i latou e matua’i tigaina e to’a 40.
Fai mai o loo tau sailia pea isi ae lē o manino mai lava le mafua’aga o le faalavelave.
O ata i luga o upega tafa’ilagi ua faailoa ane ai se afi tele ua mu ai ma taavale i lea faaitu.
O le faaitu lea o Yemen e faatonutonu e le Houthi Rebels e lagolago iai Iran ma ua leva tausaga o fai fetauiga ma le faigamalo a Yemen.
Ua ta’ua e le CNN na osofa’ia ma gaoia e le Houthi Rebels le aai o Hanaka al Masoud i le vaiaso talu ai.
Ua lē fiafia le ofisa o Amerika i Yemen i le tulaga ua tula’i mai ma fai mai a latou, o faiga faatupu faalavelave nei ua alia’e ua leai ai se filemu mo tagata o Yemen.
Puna o Faamatalaga: https://www.9news.com.au/world/explosion-at-fuel-station-yemen-kills-multiple/149aa6ac-2c2e-4869-8156-b937b2fa690a
