Foliga mai ua vavevave laititi le Auckland Transport ma ana fuafuaga na faia mo le auala i Karangahape poo le K Road.
O lea na iai fuafuaga a le pulega o le a aveesea uma kapaka o loo paka ai taavale i luga o le K Road, ae faaavanoa mo feoaiga a pasi.
O faamoemoega na faapea e amata aloaia mai le vaiaso fou, peitai e lē o taliaina e pisinisi ae sili ai o le pulenuu o Aukilani Wayne Brown ma o lea ua toe tolopo ai.
Fai mai ai ma le pulenuu, ua vavevave tele le Auckland Transport.
Ae mai le Auckland Transport, e ui ua toe tuu atu i tua le auala mo pasi e lē o suia ai lava le amata faasā o taavale ona toe paka i luga o le K Road, amata mai le faaiuga o le vaiaso nei ona o lea o le a faia faapitoa o se loading zone.
O Fepuari lea ua toe tuu atu ai i tua le aloaiaina o le faalautele o le auala mo feoaiga a pasi.
O ni fuafuaga ua faaalia ai e le toatele o le aufaipisinisi i K Road le faanoanoa tele ona o le a afegata ai a latou faleoloa e tagata feoai.
