O le a filifilia e le matagaluega o Faamasinoga ma auaunaga tau le komiuniti a Vanuatu se komiti fou i le vaiaso nei latou te tuufaatasia ni faiga faavae e faasā ai ni gaioiga e faalauiloa ai le LGBTQIA+ i le atunuu.
Ua ta’ua ia faamatalaga i le lipoti a le RNZ Pacific ua saunoa ai le National Human Rights Coordinator o Albert Nalpini, o le faai’uga ua ogatasi ma le fonotaga sa faia a minisita i le amataga o le tausaga sa silasila ai i le faia o se faiga faavae e faasā ai ni gaioiga a le LGBTQIA+ i le atunuu.
Ua saunoa Nalpini o gaioiga a le faalapotopotoga ua faaigoa o le V-Pride ua lē ogatasi ma le faavae o Vanuatu, faavae Kerisiano ma tu ma aga a tagata Melanisia.
E lē o ta’ua i le lipoti se tali a le V-Pride i le mataupu ae ua faailoa se finagalo o le sui ta’ita’ifono o le Vanuatu Christian Council, o Pastor Thomas Aki, o le V-Pride movement ua tuuina ai se faamata’u i tu ma aga faa-Kerisiano a le atunuu ma e faafetaia le malo ona o le tula’i mai e faasagatau atu i gaioiga lea o loo ta’ua i le Tusi Paia, na faaumatia ai e le Atua Sotoma ma Komoro ona o vaivaiga.
O le LGBTQIA+ e aofia ai i latou e aofia i mafutaga a itupa tutusa, faafāfine ma isi.
Puna o Faamatalaga: https://www.rnz.co.nz/international/pacific-news/532858/vanuatu-moves-to-ban-lgbtqia-advocacy
