Ua toe faaolatia i fanua ma laueleele o le faasinomaga le usugafono a le Asosi o Tusitala ma le Au Faasalalau a Samoa, ina ua mae’a le fonotaga lona valu ta’i lua tausaga a le faalapotopotoga o tagata tusitala ma faasalalau i le Pasefika, le P.I.N.A sa usuia i le atunuu o Fiti.

Ua filifilia ai se sui o Samoa o loo avea ma sui o le  Komiti Fa’afoe o le J.A.W.S e saofai i tonu fai o le faalapotopotoga i le pasefika mo le isi lua tausaga. Fa’aalia e le Pelesetene o le J.A.W.S o se fa’ailoga lea o le lagolagoina e atunu’u o loo avea ma sui o le P.I.N.A. poo le Pacific Island News Association o le toe ulufale atu o Samoa i le faalapotopotoga i le tuana’i o le 12 tausaga sa le toe avea ai ma sui ona o mafua’aga i le toe aumaia i Apia o le nofoaga tutotonu o pulega o le P.I.N.A. sa lresitala muamua ai, ma le pisipisia o le lotoifale o le faalapotopotoga i aafiaga fete’ena’i i le faasoaina o avanoa i atunu’u e maua ai fesoasoani mo le atina’e o galuega faatusitala ma faasalalau.

Advertisement

O le fiafia faamavae o le mae’a o le fono i Fiti na tatala e Samoa faafiafiaga faapasefika i le sausaunoaga a le taupou ma le manaia o se tapenaga na matua ave iai le  faimea lelei a le usugafono a le JAWS, auā o se avanoa e fa’alauiloa ai a tatou tū ma aganu’u i usugafono mai le pasefika aemaise o Niu Sila ma Ausetalia ma Amerika i le setete o Hawaii sa auai a latou foi usugafono.

O le komiti faatonu fou o le P.I.N.A. ua ta’ita’ifono ai Papua Niu Kini, sui ta’ita’ifono o le atunu’u o Solomona, ae o sui o le komiti mai vaega eseese o le galuega faasalalau i televise, leitiō, faasalalauga i upega tafāilagi, nusipepa ma faalapotopotoga o tagata tusitala ma faasalalau i atunuu ‘ese’ese o le pasefika poo national media association ua filifilia iai sui o usugafono  mai Papua Niu Kini, Vanuatu, Tonga,ma Samoa.’

O le komiti fa’afoe sa iai i le lua tausaga ua mavae ua lē toe filifilia, e aofia ai lē sa avea ma pelesetene o Kalafi Moala mai le atunuu tuaoi o Tonga.  

O le atunu’u o Papua Niu Kini ua ofo e talimalo i le fono a le faalapotopotoga i le tausaga e 2028, o se faatasiga o lo’o silasila mamao iai le asosi o tusitala ma le au faasalalau a Samoa e ono tuu atu ai sana ofo e talimalo i le fono e usuia i le  tausaga e 2030. 

Laulau fou o le Komiti Faatonu o le Pacific Islands News Association le PINA : 

President: 𝑁𝑒𝑣𝑖𝑙𝑙𝑒 𝐶ℎ𝑜𝑖 (𝑃𝑁𝐺) 

Vice President: 𝐿𝑖𝑠𝑎 𝑂𝑠𝑖𝑓𝑒𝑙𝑜 (𝑆𝑜𝑙𝑜𝑚𝑜𝑛 𝐼𝑠𝑙𝑎𝑛𝑑𝑠) 

Print Media Representative: 𝐹𝑟𝑎𝑛𝑘 𝐺𝑒𝑛𝑎𝑖𝑎 (𝑃𝑁𝐺) 

Television Representative: 𝐶ℎ𝑎𝑟𝑙𝑒𝑠 𝑆𝑢𝑚𝑏𝑒 (𝑉𝑎𝑛𝑢𝑎𝑡𝑢) 

Radio Representative: 𝑉𝑖𝑜𝑙𝑎 𝑈𝑙𝑎𝑘𝑎𝑖 (𝑇𝑜𝑛𝑔𝑎) 

Online/Digital Media Representative: 𝑅𝑜𝑠𝑒 𝐴𝑚𝑜𝑠 (𝑃𝑁𝐺) 

National Media Association Representative: Galumalemana Tumanuvao 𝐴𝑢𝑡𝑎𝑔𝑎𝑣𝑎𝑖𝑎 𝑇𝑖𝑝𝑖 𝐴𝑢𝑡𝑎𝑔𝑎𝑣𝑎𝑖𝑎 (𝑆𝑎𝑚𝑜𝑎)