Ua tū nei i le laolao tapenaga a ‘au lakapi mai atunu’u o le Oceania e aofia ai ma Samoa, ina ua lē taunu’u le taamilosaga lakapi fitu a le Oceania sa faatulaga e talimalo ai Niu Sila i le masina fou o Oketopa. O le mafua’aga, ua leai se tupe e maua mai le pulega o le lakapi i le lalolagi le World Rugby.

Ua fa’aalia ai e le faatonu o le taamilosaga o Frank Puletua i se pepa o fa’amatalaga faalaua’itele le faanoanoa tele i le tulaga ua tulai mai ona ua afāina ai polokalame o le atina’e o le taaloga lakapi mo atunu’u o loo taumafai mai e ausia tulaga lelei ma maualuga i le lakapi.

Advertisement

O Rotorua sa fuafua e faia ai lea ta’amilosaga i le faaiuga o Oketopa ae mae’a i le aso muamua o Novema. O le ta’amilosaga lea sa faatulaga e avea ma avanoa e sa’ili ai le agava’a o atunu’u o le Oceania i le taamilosaga fitu a le lalolagi i le vaega tolu poo le tier three.  

I se tasi o ta’amilosaga lakapi faavaomalo, o le ‘au a tama’ita’i le Manusina na manumalo i lana taaloga ma Hong Kong i le faaiuga o lena vaiaso i le taamilosaga o le World XV Global series challenger. O le faai’uga o le taaloga Manusina e 34 Hong Kong China o loo faia ai le taamilosaga e 17 ‘ai.

O ta’aloga muamua a le Manusina i lea ta’amilosaga na malolo i a Netherlands ma Sepania. O lea ua faatulaga mai ai o Samoa ua saofai i le tulaga 5 ma le atunu’u o Brazil, tulaga 4 o loo iai pea Hong Kong ae sii e le au a Fiti le Ipu o le siamupini o le taamilosaga.