Ua ta’ua i lipoti a le RNZ le fuafuaga a Vanuatu e tutuli ese faufautua mai fafo atu o lo latou atunuu, faufautua o loo i ofisa o le malo ina ia taofia ai aafiaga mai fafo.
Fai mai le lipoti o le a aofia ai tagata faigaluega mai Niu Sila ma Ausetalia o loo galulue ai i Vanuatu.
E lē gata i lea, fai mai le RNZ e ono aafia ai ma le sainiga o le maliega, le Nakamal Agreement ua leva ona feta’ua’ina i le va o Vanuatu ma Ausetalia.
O le vaiaso talu ai na pasia ai e Vanuatu se suiga i le tulaga tau le puipuiga i lona atunuu ma sa faailoa ai e le Palemia, Jotham Napat o le a aofia ai foi ma Saina i suiga e pei ona feta’ua’ina ma ua faatonuina ai le aveese uma mai o le aufaufautua mai ofisa o le malo.
O loo ta’ua i le lipoti se faamatalaga mai le ofisa o le va i fafo a Ausetalia e faapea, o loo faatalanoa i le taimi nei lea matāupu ma paaga i le faigāmalo a Vanuatu.
Puna o Faamatalaga: https://www.rnz.co.nz/international/pacific-news/579068/vanuatu-flags-expulsion-of-foreign-advisers-from-government-buildings-as-nakamal-agreement-hangs-in-balance
