Ua tu nei le faila ma ua faaulufale le Malumalu tele o le Ekalesia Katoliko i le afioaga o Lepea e valu tausaga o fausia, i le tau e silia i le 12 miliona tala.
O se galuega e lei faigofie ona o le tele o lu’itau ma faafitauli sa fetaia’i ma le aulotu, ona e fa’i o le sailiga o seleni, ae o le tau o mea faufale faaopoopo iai ma le totogi o le tufuga ma le aukamuta e le taugofie.
O le faamai misela ma le faamai koviti 19 o nisi ia o luitau tetele a o faagasolo le galuega peitai e lei solomuli le aulotu, i le mau pea o le toovae ma le faatuatua i le talitonuga o le mea e iai le loto e iai le auala e fai a’i. O le tagata faatuatua foi ma talitonu e tali le Atua i lona tautiga.
Le Teutupe o le Ekalesia Katoliko i Lepea afioga Fuimaono Vito ma se vaega o le tala o le galuega.
O le Aso Faraile na tea nei na umusa ma faaulufale ai le galuega, sa auai taitai o le malo mai lana afioga i le Ao o le malo, le Palemia ma minisita o le kapeneta faapea le fofoga fetalai ma sui faipule o le Palemene.
O le afioga i le Aki Epikopo Alapati Lui Mataeliga o le faauluuluga o le puleaga Samoa Apia na taitai i le sauniga o le misasa na faapaia ai le Malumalu, ae sa auai foi ma le Epikopo o le faauluuluga o le puleaga a Samoa Pago Pago.
O taalolo eseese sa molimoli ai faaaloaloga masani ma meaalofa tupe, o nisi ia o vaaiga o le aso o le faaulufalega o le Malumalu fou. Na liliu foi le ekalesia Katoliko i Lepea ma faatino lona valevale alofa e ala i faaaloaloga faaleaganuu mo Malo valaaulia ma le maave eseese o uo ma aiga sa auai i le faamoemoe.
