Ua taunuu i le ofisa o le ta’ita’i o le malo o Samoa le afioga i le Palemia le valaau faaaloalo mai ta’ita’i o le faigāmalo a Amerika Samoa ina ia auai atu le afioga i le Palemia, susuga Laaulialemalietoa Leuatea Polataivao Fosi Schmidt i le sauniga e tatala aloa’ia ai le Maota Fono fou o le fono faitulafono a Tutuila ma Manu’a.
O lea valaau faaaloalo sa faailoa i le feiloa’iga a le Palemia o le malo o Samoa ma le afioga i le Fofoga Fetalai o le maota o sui le afioga Savali Talavou Ale, ma le afioga i le Senatoa afioga Olo Lu’uao Letuli.
O le Aso Tofi i Samoa ae o le Aso Lulu lea o le vaiaso nei i Amerika Samoa o le a tatala ai le Maota Fono, ae o le malaga mai i Samoa o le Fofoga Fetalai o le maota o sui ma se tasi o afioga i Senatoa sa maua ai se avanoa e talanoa ai i nisi o matāupu o loo lipoi i totonu o le Atoa o Samoa, o se faatasiga i le va o ta’ita’i o faigāmalo a Samoa e lua.
O le Aso Lulu lenei ua toe taliu ai le faigā malaga sa aofia ai ma nisi o faipule o le maota o sui ma se loia.
O le faatautoina o sui faipule o le paea’iga lona 17 a le Palemene o Samoa ia Setema na valaaulia ai mo le taimi muamua e le ta’ita’i o le tatou malo le Kovana Sili, Fofoga Fetalai, Pelesetene o le Senate ma nisi o sui maualuluga o le faigāmalo a Amerika Samoa e auai i lea sauniga i le mae’a o le palota tele a Samoa aoao i le masina o Aokuso o le tausaga nei.
