O le asō na amatalia aloaia ai le uluai malaga faalemalo a le afioga i le Palemia o Samoa, Fiame Naomi Mata’afa i totonu o Niu Sila, ma i le sauniga i le taeao nei na faafeiloai ai e le afioga Jacinda Ardern ma sui o le malo o Niu Sila le taunuu mai ai o lana afioaga i le Sa’o Faapito.
E pei ona silafia o le uluai malaga faalemalo lea a le afioga Fiame talu ona pale mai i le tofi Palemia i le tausaga na te’a nei.
I lea feiloaiga na valaaulia ai e Fiame le Palemia o Niu Sila Jacinda Ardern i le faamanatuina o le 60 tausaga o le feagaiga o le faauoga i le va o Samoa ma Niu Sila poo le Treaty of Friendship lea na sainia e lona tuaa i le tausaga e 1962.
O lea sauniga faapitoa o le a faia i Samoa i le masina o Aokuso ma o se taimi o i luma ona faailoa lea pe o le a auai atu ai le Palemia o Niu Sila i lea faamoemoe tāua mo Samoa.
E tele nisi o polokalame faagasolo o le a auai atu iai le tamaitai Palemia, e lē gata i le laumua o Ueligitone ae faapea i Hawkes Bay ma Aukilani i nai aso o i luma.
