Ua iai lo tatou atunuu i lenei masina tāua o le kalena a le au Kerisiano e faamanatu ai le Eseta poo le Aso Maliu ma le Toetu o le Faaola e pei ona faamanatu foi e le lalolagi o le au Kerisiano latou te faatāua lea aso faamanatu i tausaga uma.
O le Aso Faraile o le vaiaso fou e pa’ū tonu iai le Aso Maliu o lenei tausaga, ae o le faai’uga o le vaiaso nei i le Aso Toonai o le a faamanatu ai e tagata tapua’i o le Molimau a Ieova i Samoa le aso na maliu ai Iesu.
O se sauniga e faamamalu iai lea tapua’iga e pei ona faailoa i se pepa o faasalalauga, ma ua faailoa ai o le tausaga na te’a nei e 2,500 tagata Molimau a Ieova faapea isi tagata lotu Kerisiano i le atunuu sa auai i lea sauniga faamanatu.
Ae i le lalolagi atoa i le tausaga na te’a nei 2024, ua faamauina e lea tapua’iga e 21 miliona tagata Molimau a Ieova faatasi ma tagata sa latou valaaulia e auai i le sauniga faamanatu o le Aso Maliu.
Ua valaaulia ai e lea tapua’iga lo tatou atunuu e auai i le latou sauniga faamanatu o le a faia i le afiafi o le Aso Toonai nei ma e 11 nofoaga a Molimau a Ieova o le a faia ai; e lua i Savaii ae iva i Upolu.
