E lua ni sauniga faapitoa o loo tapena e le Faatuatuaga Baha’i i Samoa ma Amerika Samoa e faia i le Malumalu Tapuai o le faatuatuaga i Tiapapata, i le taimi o le Fono a Malo o le Taupulega i Samoa i le masina lenei o Oketopa ua amatalia.
Ua ta’ua ia sauniga o Interfaith Services ua valaaulia ai Ta’ita’i ma faauluuluga o malo e 56 ma latou usugafono, ma ua faaalia ai e le Faatuatuaga Baha’i i se pepa o faamatalaga faalauiloa o ni sauniga o le a sami ai le atoaga o le 40 tausaga talu ona faaulufale ma tatala le Malumalu Tapuai i Tiapapata ia Setema o le tausaga e 1984, ma le atoaga o le 70 tausaga talu ona taunuu i laueleele o Samoa le faatuatuaga Baha’i lea na aumai i le tala’iga a se tamaitai Peresia o se pioneer.
E taunuu i Samoa le faatuatuaga i le tausaga e 1954 o loo faagasolo taualumaga o le Fono Faavae na tapenaina le avea o Samoa ma malo tuto’atasi.
O le ono o tausaga talu ona tuto’atasi Samoa mai pulega faakolone ae faamautū le avea o le afioga i le Tapaau Faasisina le Susuga Malietoa Tanumafili II ma sui auai poo se tagata talitonu o le faatuatuaga Baha’i.
Ua faatulaga mai o le Aso Sa, 20 o Oketopa le tasi o sauniga faapitoa ma le sauniga mulimuli i le Aso Sa, 27 o Oketopa.
E lē gata o ni sauniga o loo valaau faaaloalo ai i ta’ita’i o Malo o le Taupulega ma latou usugafono, ae o loo avanoa foi mo le lautele o le atunuu e fia auai.
