Toeitiiti lua itula le umi o le lauga a le peresetene o Saina Xi Jinping sa faia i le silia ma le 2000 o tagata. Fai mai ua valaau ai lea taitai ia faavave le tuufaatasia o se vaega faa militeli e aupito i lelei, o sana saunoaga lea na faia e tatala aloaia ai le fonotaga a le Pati Kominisi i le atunuu le Communist Party Congress pei ona lipotia e le 7News a Ausetalia.
O Jinping ua 69 tausaga o le soifua ma o loo feta’ua’ina foi e ono toe manumalo foi i le palota mo le faatolu ai lea o taimi i le tofi peresetene ma o le a faamautuina ai o ia le taitai aupito malosi o Saina talu mai lo latou taitai iloga o Mao Zedong.
Fai mai lana saunoaga ua alagatatau ia Saina ona faasauni mo taimi lamatia i le taimi o le filemu, sauni mo aso timuga ma ia sauni e lava onosaia luitau o matagi malolosi ma galu maualuluga.
Sa ia valaau foi mo le faamalosia o le agavaa i puipuiga o le atunuu, faamautu o loo lelei le sapalai o taumafa ma ia lelei sauniga i le feagai ai ma ni faalavelave tutupu faafuasei ma le puipuia o faamaumauga faalilolilo o tagata.
O le vaega na aupito malosi le tali ane ai o tagata ma faailoa lo latou lagolago o le faailoa atu lea e le peresetene o le tetee o Saina i le tutoatasi o Taiwan.
