O le feagai ai o le tatou atunuu ma aso faailogaina o le tau amata ai o le tausaga fou ae taia le faafofoga ma le silasila i le tala faanoanoa, o le valaau paia a le Matai Sili i se tasi o tamalii lauiloa i faafiafiaga o le fai faleaitu mālie, le tofa Taavaomalii Petelo Asomua.
E iloa tele o ia i lona suafa muamua auā e leai se isi Petelo e iloa e le atunuu ua na o le fai faleaitu, e lē gata e mālie ana tala ma ana gaioiga ae a saasaa o se tagata e ese le onomea.
O se faasalalauga i luga o upega tafa’ilagi sa faatalanoa ai o ia i se tausaga e le’i mamao tele atu, ma ia faamatala ai lana taleni o se meaalofa mai le Atua, sa fesoasoani i le limavaivai o lona aiga i Samoa.
O se taleni foi sa ia fesoasoani ai i le tele o galuega o malumalu a ekalesia sa latou ave o ia i malaga e faafiafia ai, ona o le sa’iliga o ni seleni.
O aso faailogaina o le tatou malo e pei o tuto’atasi, ma le Teuila o nisi ia o sauniga sa masani ona faafiafia ai Petelo poo le tofa Taavaomalii.
O se talanoaga a le tofa Taavaomalii Petelo Asomua a o soifua, ma le tamaitai o Luana Nauer o le polokalame o le Gems of the South Pacific i Amerika.
O se tamalii foi sa iai lana auaunaga mo le Radio Samoa.
E tuumalo Taavaomalii Petelo Asomua ua 81 tausaga o lona soifua.
O ona afioaga o Faleapuna sa soifua a’e ai, o Saoluafata, Lotofaga, Matatufu, Poutasi Falealili ma Falelatai.
