Ua valaau nei le iuni o tagata faigaluega i fela’ua’iga i Niu Sa Uelese i le faigāmalo a le setete ina ia faamuta loa le totogiina o pasese mo auaunaga tau fela’ua’iga faalaua’itele a o vaaia ai le tele o tagata ua tuu le faaaogāina o taavale ona o le taugatā tele o le penisini.
O le kiso i le taimi nei ua silia i le $3 i le lita ua faatau ai i nisi vaega o le atunuu ae tai faapea foi ma le unleaded, ma ua vaaia ai le to’atele o tagata ua faaaogā auaunaga faalaua’itele tau femalagaa’iga e feoa’i ai i galuega ma isi fuafuaga.
O le finau a le Iuni e faapea e tatau ona faaitiitia le tau o pasese pe leai foi se pasese mo sina taimi se’ia toe maua se faamāmā avega i le tau o le penisini.
Saunoa le Minisita o Fela’ua’iga, John Graham o le taimi nei o loo matua’i talafeagai le pasese o loo iai ma o se isi fesoasoani lea mo le atunuu femalagaa’i pe afai e popole i le tau o le penisini.
O le faamatalaga mai le malo ua ta’ua ai e lē o iai ni aafiaga tele i le auina mai o le suāuu ona o le taua i Sasa’e Tutotonu, e faamaonia foi e le Minisita o Malosi’aga, Chris Bowen i le 9News, e na o le 6 mai le 81 o uta o le suāuu i Ausetalia lea ua faalēaogāina talu ona amata le taua i Sasa’e Tutotonu.
Puna o Faamatalaga: https://www.9news.com.au/national/free-public-transport-sydney-nsw-fuel-crisis-australia/2979dce3-7e29-4865-9d01-62c803b02d90
